Tuesday 3 July 2012

halak batak do ho?


Adong do sada sungkun-sungkun di rohaku taringot na martondong di hami halak batak. Godangan hubereng di hami halak batak, molo ro tubu ni anggina manang tutur na sian huta lao tinggal di jabuna, antar lao sadia leleng  sai intor marsigorgor  do elat di roha na. Dang boi dibahen ianokhon ni tutur na i gabe songon tubu na sandiri. Intor mardikan do holong i dibahen. Apalagi molo tutur na ro i sian huta manang lebih huta sian huta na ditopot na i. On ma sada na mambahen tubu di roha ni angka na naeng mangaronto, dang olo mandege jabu ni tutur na. Tumagon ditaon-taon marsikor manang didia daripada ingkon tinggal di jabu ni tutur na.

Godang hubereng na masa songon on. Molo ro tutur na sian huta, paula so disangko. Intor merasa diri sok kota ma angka jolma na tinggal di Jakarta on. Hape molo ni rimangan, dao dope lebih berkualitas angka halak na tubu jala magodang di huta daripada angka jolma na tubu jala magodang di Jakarta on. Tung so binoto do angka aha na dihaginjangkon na. Sai dilesengi ma angka jolma na ro sian huta, didok "parhuta-huta" hape sebenarna naung maila do halaki mangida diri na sandiri, ala dang adong gogona lao mangaranto. Sai lalap mangasangkon haJakarta on na. Hape di Jakarta pe halaki sona gabe manang ise, tong do songon-songon i.

Molo di luar, tarsohor ma halak batak i, sada suku na tung mansai denggan jala uli situtu do angka na martondong, tarida ma i sian gok na i angka punguan-punguan marga. Hape molo masuk iba tu bagasan tarida ma na godangan angka gilok jongkal.
Tung mansai maol do mangida halak batak na mardos roha jala mardenggan. Elat, late, hosom, teal sai tong do marurat di bagasan roha na be. Nang pe nunga tinggal di Jakarta on. Jala sude do halak batak punasa on. Au pe adong di au on. On ma sada pergumulan berat nuaeng di angka halak batak na bisuk maroha. Boa ma carana asa boi elat, late, hosom, dohot teal on dang gabe manusai jala unang be dipake be tu parale-aleon manang tu na martondong.

Angka natua-tua di Jakarta on, nunga maol na lao sitiruon. Na maolan do sonari on natua-tua lao mandok hata tu angka ianakhon na. Boasa boi songon i, ai nunga sala mandasor. Molo ro tutur na sian huta, dang dipasingot angka ianakhon na i lao mangkaholongi tutur na i. Ai boa ma ibana pasingothon ai ibana pe sona boi mangkahaholongi tutur na i. Jai, tung mansai lam susah so parngoluan on. Susah di perhepengon susah ma muse dipartondongon. Sudena si buat na di dirina be. Natuatua salah mamemehon, angka ianakhon pe dang olo marsiajar. 

Jai, tung mansai maol situtu do parngoluan di hami halak Batak. Molo adong sada halak na so halak batak lao masuk tu keluarga batak, ingkon sahalak na pir ma ibana. Ai gok elat, late, teal, hosom, na so boi longkang sian pamatang ni halak batak. Molo dang adong be na opat on di sada halak batak, boi ma disungkun, halak batak do ibana manang daong?